أغرب مواقف قابلتني في حياتي وأثرت فيا
الأول مرة كنت مضايق جدا وانا من عادتي لما ابقي مضايق بروح اقعد علي قهوة شعبي دا مش معناه ان انا ارستقراطي و لا راس مالي لا سمح الله بس بروح اقعد علي قهوة من اللي اغلبية روادها ناس مش فقيرة لا تحت الفقر نفسه مش عارف لية بحس ساعتها اني انا او الاحزان اللي انا شايلها معايا ورايح بيها هناك قليلة اوي قدام احزنهم بحس اني بادلع في اختلاق الماساة بالنسبة للبيدفع ربع جنية شلنات وبرايز تمن كوباية الشاي , المهم ماكنش معايا فلوس يوميها و كنت في مشاكل ما يعلم بيها حد اشتريت بخمسين قرش سجاير فرط ( 10 سجاير ولبانة ) كانت ايام الرخص بقي ورحت اقعدت هناك وطلبت واحد قهوة علي الريحة باخر جنية معايا ومش عارف هروح ازاي واقعدت افكر والدنيا تشلني وتحطني القهوة خلصت مع السجاير وقعدت لحد ما دخل واحد شحات اعمي من اللي علي باب الله دول قعد علي الترابيزة اللي علي يميني وطلب ينسون وكان بيعمل حركات غريبة جدا يحرك الكوباية من علي الترابيزة ويدور عليها , المهم انا كنت خرمان مفيش سجاير والفلوس خلصت لحد ما لقيت الراجل دا بيقوم من علي كرسيه وماشي يخبط في الناس لحد ما قرب مني وقعد يحسس علي الترابيزة انا قلت عايز حاجة قولتله خير يا حج عايز حاجة مردش وطلع من جيبه علبة سجاير سوبر وقاللي خد سيجارة في الاول رفضت بردة نوع من الكبر مش عارف ولا لأنه صعب علية بس المهم انه الح أخدت السيجارة ولعته وعلي الرغم من انه اعمي لقيته بيبصلي اوي انا خفت بصراحة وقاللي : هيا الدنيا كدة نكد في نكد , انا وقفت مكاني مش عارف ارد شفته بيمشي بعيد وبيردد الكلام اللي بيقوله دا لحد ما اختفي وسط الزحمة والناس , اشمعنه جالي انا بالذات وازاي شافني وهوه اعمي وليه اداني سيجارة وعرف منين ان انا حاسس ان الدنيا كلها نكد والله انا لحد دلوقت مش عارف روحت المكان دا اكتر من مرة بعد كدة مخصوص عشان استناه بس عمره ماجه , الراجل دا انا عمري ما حنياه في حياتي وكتبت فيه قصيدة علي الفكرة ودي بقي البوست الجاي ان شاء الله
اللي عايزهم يعملوا الموضوع دا
المواطن المصري العبيط
ادم المصري
ملحوظة
هذه المدونة مدونة ادبية وهذه المرة هي المرة الأولي التي اكتب فيها باللهجة العامية وذلك حيث ان الموضوع يقتضي مثل هذا الاسلوب
6 comments:
بصراحة الموضوع يستاهل
وانا اوعدك اني احاول اصيغها في قصيده كسر كده علي قد حالي
بس ده بده ما يمنعشي ان انت ياريس تسمعنا ابداعك
معلشي يا ابو حميد انا عايزك ضروري في البلوج عند قبل يوم التلات لان فيه موضوع مهم
احنا عندنا بصر وهم عندهم بصيرة
!!!!!!!!!!!!
ادم
شكرا علي اهتمامك
طاهر
عندك حق في دي
فى ناس كتير تملك نعمة البصر لكن للاسف لا ترى
وهناك آخرون لا يملكون هذه النعمة العظيمة لكنهم يستطعون رؤية كل شىء بوضوح
اللهم اجعلنا من أصحاب البصيرة اللهم آمين
وبرده بقولك يا أحمد يا نابغة ولك منى كل التحية
علي فكرة انت ربنا بيحبك لانة اكيد بعد الراجل ما مشي حسيت ان الاحزان ما تجيش ولا حاجة جنب راجل بسيط وفقير وغلبان لكن ربنا علي قد دة ما بينساش عبيدة وادالة نعمة مميزة عموما انا شايفة ان كل واحد مننا محتاج في فترة من فترات حياتة راجل زي دة واسلوبك فعلا جميل وبسيط في الشرح وسلس
Post a Comment